Осетинский язык он-лайн

Уе 'зæр хорз, адæм! Æмæ уæ Нæуæг азы хорзæх уæнт! Иу ахæм фарст: Гамлеты монолог иронау куыд ссарон? Йæ текст.

Ратæлмацгæнæг — Малиты Васо.
[Æртыккаг акт. 1-аг сценæ.Фрагмент]
Гамлеты монолог
О, уым ис фарста: уон æви нæ уон.
Цы цæфтæ ’мæ къæрццытæ уайы удыл
Мæрддзæст хъысмæтæй, уыдонæн быхсон
Æви фыдæхты денджызæн йæ ныхмæ
Æрлæууон, скæнон удхæрттæн кæрон?
Мæрдрох дыл бафтæд. Амæл. Гъе æрмæст ма
Уый зон, кæй у фæстаг тæлмæн дæ фын
Дæ буар, дæ уды мингай гом хъæдгæмттæн.
Уый нæу бæллиц? Мæлæт. Мæрдрохы фын.
Фынæйæ уын фынтæ? Уый — дзуапп мæ фарстæн.
Цы фынтæ ма уындзæн йæ фыны мард,
Куы суа зæххон æнкъарæнтæй хæрзафтид?
Йæ аххос уый у. Уымæн бæллы лæг
Æнамондæй дæр а зæххыл цæрынмæ.
Æндæр куыд ис ныббарæн дуджы ’фхæрд, —
Æнаххос уды чи ’ппары цъысымы,
Æдзæсгом хицæутты æнæфсарм уаг, —
Бар чи хурх кæны, уарзондзинад та — маргæ,
Ысгуыхт лæгтæн хæрам лæджы тæрхон, —
Куыд ис ныббарæн? Кæд æмæ æхсаргард
Йæ иунæг цæфæй скæнид сын кæрон?
Кæй фæндид царды стыр уаргъы бын хилын,
Куы нæ тæрсиккам, н’ адзалы фæстæ
Цы уыдзæн, уымæй, — мæрдтыбæстæй иу дæр
Нæма раздæхт. ’Мæ сразы вæййæм мах
Нæ зонгæ стыр фыдæхтимæ цæрыныл,
Мæрдкъуырма тармæ лидзыны фæлтау.
Тæппудтæ скæны уыцы хъуыды махæй,
Нæ æрдзон ныфсыл алайау зыны,
Йæ мынæг рухс нæ мæллæг зондæн тары
Зынг раттын нæу нæ хъуыддæгтæн йæ бон, —
Æмæ сæ нысан никуы ’ргъæвынц царды, —
Мæлынц фæндагыл. О, фæлæ æгъгъæд! —
Офелия! Мæ уды цин! Куы кувай, —
Мæ тæригъæдты кой дæр-иу ыскæн.
————————————————————————————
Иннæ тæлмац ис ссарæн сайт вконтактейы. Зæлты (аудиоты) хсæн ис монолог "Уон æви нæ уон" (афтæ дзы хуыйны).

Стыр бузныг!